Alþjóðlegt ökuskírteini

http://www.fib.is/myndir/OKUSKIRTEINIPASSAMYND.jpg

 

Íslensk ökuskírteini, eins og þau líta út í dag, eru viðurkennd til aksturs innan EES landanna (að teknu tilliti til reglna hvers lands um lágmarksaldur og einnig þarf sérstök réttindi til aksturs í atvinnuskyni). Þetta á við hvort sem viðkomandi dvelur sem ferðamaður í viðkomandi ríki eða tekur upp fasta búsetu í því.

Alþjóðlegt ökuskírteini má gefa út til þess sem hefur gilt íslenskt ökuskírteini og er orðinn 18 ára. Skírteinið gildir í ár frá útgáfudegi þess og tekur einungis til ökutækja sem hlutaðeigandi hefur rétt til að stjórna samkvæmt hinu íslenska ökuskírteini. Alþjóðlega ökuskírteinið er staðfesting og í leiðinni þýðing á íslenska ökuskírteininu. Alþjóðlega ökuskírteinið dugar ekki eitt og sér heldur þarf ávallt að framvísa íslenska ökuskírteininu og alþjóðlega ökuskírteininu saman. Alþjóðlega ökuskírteinið veitir eitt og sér ekki rétt til að stjórna ökutæki.

Utan landa Evrópska efnahagssvæðisins eru reglur um viðurkenningu mismunandi. Í mörgum ríkjum er það viðurkennt til aksturs þegar viðkomandi dvelur þar sem ferðamaður. Nær undantekningalaust þarf viðkomandi að skipta í þjóðarskírteini viðkomandi ríkis taki hann upp fasta búsetu þar. Leiki vafi á hvort íslenskt ökuskírteini er viðurkennt til aksturs þegar viðkomandi dvelur sem ferðamaður í ríkinu er öruggast að hafa auk þess alþjóðlegt ökuskírteini (sýslumenn og FÍB gefa út alþjóðlegt ökuskírteini og er það gefið út til eins árs). Mjög mismunandi er eftir bílaleigum hvort þær biðja um alþjóðlegt ökuskírteini. 

Ákvæði um alþjóðleg ökuskírteini má sjá í samningi gerðum á vettvangi Sameinuðu þjóðanna um umferð á vegum, sem birtur var í C-deild Stjórnartíðinda sem auglýsing nr. 9 25. júlí 1983.

Alþjóða ökuskírteinið er viðurkennt í öllum löndum að Kína undanskildu, gildistími skírteinisins er 1. ár frá útgáfudegi. 

Til að fá alþjóðlegt ökuskírteini.

1. 
Umsækjandi þarf að mæta á skrifstofu FÍB, Skúlagötu 19 milli kl. 8.30 - 15.00,  sjá staðsetningu hér

2. 
Ein ljósmynd (passamynd 35 x 45 mm) ekki eldri en 3 ára. Myndin verður að vera á endingargóðum ljósmyndapappír, merkja og stimplalaus. Ef þú átt ljósmynd á rafrænu formi getur FÍB prentað hana út, sjá nánar hér

3. 
Framvísa gildu ökuskírteini.

Alþjóðlegt ökuskírteini
Verð kr. 840.-  fyrir félagsmenn FÍB, 
Verð kr. 1200.- ófélagsbundna

Afgreiðslutími er innan við 10 mín

ATH!. Ekki er hægt að sækja alþjóðlegt ökuskírteini fyrir annan aðila hjá FÍB, Sýslumaðurinn í Kópavogi afgreiðir alþjóðlegt ökuskírteini fyrir þá sem ekki eiga kost á að nálgast það sjálfir, t.d vegna dvalar erlendis. Sýslumenn víða á landsbyggðinni útbúa alþjóðlegt ökuskírteini,  http://www.syslumenn.is/

Umsækjandi verður að vera með fullnaðarskírteini. Ekki er hægt að fá alþjóðlegt ökuskírteini ef viðkomandi er einungis með bráðabirgðaskírteini. Hægt er að fá alþjóðlegt ökuskírteini ef viðkomandi er með bráðabirgðaakstursheimild.

Florída:
Lögð er áhersla á að erlendir gestir í Florida séu með gild ökuskírteini frá sínu heimalandi en alþjóðlegt ökuskírteini er ekki skylda. Yfirvöld í florida og FÍB mæla sterklega með alþjóðlegu ökuskírteini til að koma í veg fyrir misskilning. 

Yfirvöld í Florida fresta fullnustu á kvöðum um alþjóðlegt ökuskírteini

Nánar um International Driving Permit