Öryggi

Eru rafbílar jafn öruggir og venjulegir bílar?

Að sjálfsögðu eru rafbílar árekstrar- og öryggisprófaðir á sama hátt og venjulegir bílar og standa þeim jafnfætis að öllu leyti.

Margir rafbílar eru ágætir fjölskyldubílar í daglegri notkun en eru takmarkaðir til sumarleyfisferðalaga.

Fyrsti rafbíllinn sem hlaut fullt hús stiga og fimm stjörnur í árekstursprófi Euro NCAP var Nissan Leaf. Þeir sem síðan hafa verið prófaðir á sama hátt hafa flestir reynst ágætir. Rafbílar eru ekki lengur óöruggari en aðrir bílar. 

Rafbíll sem hversdagsbíll fjölskyldunnar

Þróunin hefur síðustu árin verið sú að rafbílarnir eru ekki lengur tveggja manna yfirbyggð hálfgildings vélhjól heldur fullveðja  fimm manna öruggir fjölskyldubílar sem mæta hversdagsþörfum fjölskyldunnar.  Allur öryggisbúnaður er minnst jafngóður og í öðrum bílum - búinaður eins og loftpúðar, skrikvörn og Isofix búnaður fyrir barnastólana.

Festir rafbílar á Evrópumarkaði eru litlir og meðalstórir fjölskyldubílar sem hæfa vel þörfum fjölskyldunnar. Þeir nýtast til aksturs til og frá vinnu, til innkaupa, til að keyra börnin í skólann, í íþróttir og tómstundastarf og til að skreppa í heimsóknir eða í sunnudagsbíltúrinn. Þetta eru þægilegir og öruggir bíla og sérlega ódýrir í rekstri. Tesla S bíllinn er öðruvísi því að hann er lúxusbíll og auk þess gríðarlega öflugur og hraðskreiður, en líka dýr að sama skapi. 

Takmörkuð sumarleyfisferðalög

Eini rafbíll dagsins í dag sem talist getur til fyrirtaks ferðabíla er Tesla S. Hann er langdrægastur og með mesta farangursrýmið. Vinsælasti rafbíllinn hingað til er Nissan Leaf er skammdrægari og farangursrými hans er minna. En á nýju ári er væntanleg ný kynslóð Nissan Leaf sem er mun langdrægari og með meira farangursrými en áður.

En tegundum og gerðum rafbíla fer ört fjölgandi og má búast við stórauknu úrvali strax á næstu mánuðum.

Dráttarkúla á rafbílum

Enn sem komið er eru rafbílar ekki fáanlegir með dráttarbeisli. Ekki er því hægt að festa kerru eða tjaldvagn aftan í þá. Dráttarbeisli er  mikilvægur aukabúnaður fyrir marga bílaeigendur og -kaupendur. Ástæður þessa eru aðallega tvær. Í fyrsta lagi er rafhlöðunum í rafbílum komið fyrir í holrúmum og hólfum í burðarvirki bílanna og því ekki beinlínis rými fyrir átakamikinn búnað eins og dráttarbeisli. Í öðru lagi þarf almennt að gerðarviðurkenna bíla og/eða taka þá sérstaklega út fyrir búnað af þessu tagi og enginn framleiðandi hefur enn sem komið er gert neitt slíkt í tengslum við rafbíla. Það á efalaust eftir að breytast eftir því sem tækninni fleygir fram og rafbílarnir verða algengir eins og fyrirsjáanlegt er.

Hvar finn ég árekstrarprófanir?

• Euro NCAP stofnunin sem samtök bílaklúbbanna (þar á meðal FÍB) eiga og reka öryggisprófar alla bíla sem seldir eru í Evrópu.  Þú getur fundið niðurstöðurnar fyrir alla bíla sem prófaðir hafa verið að rafbílum meðtöldum hér. Með því að velja EV and hybrids undir tenglinum Quickviews finnurðu raf- og tvinnbíla þá sem prófaðir hafa verið. Sjá nánar hér.

 

• Tesla S hefur ekki enn verið prófaður hjá EuroNCAP. Bandaríska stofnunin National Highway Traffic Safety Administration hefur það hins vegar og þar reyndist bíllinn sá öruggasti sem nokkru sinni hefur verið prófaður hjá þeirri stofnun.

Hér eru niðurstöður NHTSA.