Aðeins bílar með ESC geta framvegis fengið fimm stjörnur

Framvegis verður ESC stöðugleikabúnaður forsenda þess að bílar geti yfirleitt fengið fimm stjörnur í árekstursprófum EuroNCAP. Prófin verða hert umtalsvert. m.a.  með því að nú verða sæti bíla metin út frá meiri eða minni líkum á hálshnykk við árekstur. Jafnframt verður öryggiseinkunn fyrir börnin í aftursætinu og fyrir fótgangendur reiknuð inn í aðal-öryggiseinkunn bílanna. Runólfur Ólafsson framkvæmdastjóri FÍB segir að þessar nýju matsreglur EuroNCAP séu framför og framhald á því árangursríka starfi sem stofnunin hefur unnið og sem hefur og mun áfram skila almenningi stöðugt öruggari bílum.

Til þessa hafa rannsóknir EuroNCAP einkum beinst að því að kanna öryggi ökumanns og farþega í framsæti ef slys verður. Þetta hefur verið meginforsenda öryggiseinkunnar bílanna. Bílaframleiðendur hafa jafnt og þétt gert endurbætur á bílunum í samræmi við niðurstöður EuroNCAP og er nú svo komið að öryggi  ökumanns og framsætisfarþega er í flestum tilfellum orðið bærilegt. Því vill EuroNCAP nú beina meiri kröftum að öryggi fótgangandi og að öryggi barnanna í aftursætinu og reikna niðurstöður um öryggi þeirra inn í heildar-öryggiseinkunn hvers bíls, sem ekki hefur verið gert fram að þessu.

Nýjung er einnig að framvegis verða framsæti og hnakkapúðar bíla skoðuð sérstaklega með tilliti til hættu á hálshnykk og niðurstöðurnar reiknaðar inn í öryggiseinkunn bílanna. Síðar í mánuðinum verða birtar niðurstöður um hálshnykkshættu í þeim 25 bílum sem árekstursprófaðir hafa verið á þessu ári. Einstakir matsþættir verða með mismunandi mikið vægi í heildar-öryggiseinkunn hvers bíls. Hver matsþáttur, eins og öryggi fullorðinna, öryggi barnanna í bílnum og fótgangandi, verður skilgreindur og birtur sérstaklega til að neytendur geti betur áttað sig á hlutunum út frá eigin forsendum og fjölskylduhögum.

Allir þessir öryggisþættir koma síðan saman í einni heildareinkunn sem
getur hæst orðið fimm stjörnur. Bæði bílaframleiðendum og söluaðilum bíla verður frjálst og að nota þessar upplýsingar í auglýsingum og kynningum á viðkomandi bílum. Sérhvert áreksturspróf verður svo með ársmerkingu þannig að EuroNCAP getur haldið áfram að þróa árekstursprófin án þess að hætta verði á ruglingi milli nýrra og eldri árekstursprófa. 

Fyrstu niðurstöður árekstrarprófa samkvæmt nýju vinnureglunum verða birtar í febrúar nk.  Dr Michiel Van Ratingen, framkvæmdastjóri Euro NCAP sagði þegar nýja fyrirkomulagið var kynnt að enginn vafi léki á því að það þýddi auknar kröfur á hendur bílaframleiðendum en jafnframt meiri heiður fyrir það sem vel er gert.

Allar nánari upplýsingar um áreksturs- og öryggispróf EuroNCAP og um niðurstöður varðandi einstaka bíla er og verður að finna á heimasíðu EuroNCAP.

ESC stöðugleikabúnaður verður framvegis forsenda þess að bíll geti fengið fimm EuroNCAP stjörnur.