Danir herða lög um áfengisakstur

Um sl. mánaðamót tók gildi í Danmörku ný lög um endurheimt ökuréttinda eftir dóm fyrir áfengisakstur. Endurheimt ökuréttindanna er nú háð því að í bíl hins dæmda verði sett ræsivörn sem gerir ómögulegt að gangsetja bílinn fyrr en ökumaður hefur blásið í munnstykki á búnaðinum og búnaðurinn ekki mælt neinn áfengisþef í blæstrinum.

Kostnaðurinn við að setja búnaðinn í bílinn er metinn á 20—25 þúsund danskar krónur eða 4-5 hundruð þús. ísl kr. og þarf eigandinn sjálfur að kosta því til. Réttindamissir er yfirleitt tvö ár en sé ökumaður ekki tilbúinn til þess að kosta ísetningu ræsivarnarbúnaðar í bíl sinn, getur hann neyðst til að bíða í tvö ár til viðbótar áður en hann fær bílprófið aftur.

Í frétt á heimasíðu danska dómsmálaráðuneytisins segir Mette Frederiksen dómsmálaráðherra að áfengi sé en helsta ástæða þess að fólk slasast eða deyr í umferðinni og að engin afsökun sé finnanleg fyrir akstri undir áfengisáhrifum. Ræsivarnarbúnaðurinn sé eitt þeirra verkfæra sem beita þurfi til að útrýma áfengisakstri auk stöðugs eftirlits lögreglu.

Fyrir að hafa ekið með allt að 2 prómill áfengis í blóðinu og brotið er ekki það fyrsta, missa hinir brotlegu ökuréttindin í tvö ár. Að þeim tíma liðnum gefst þeim kostur á að fá ökuskírteinið til baka gegn því að fá áfengisræsivörn í bílinn og jafnframt að gangast undir rannsókn á því hvort eða á hve háu stigi áfengisvandamál viðkomandi er. Ennfremur verða þeir að sæta áfengismeðferð og sitja auk þess sitja námskeið í umferðarlögum og -reglum. Þiggi fólk hvorugt, verður það einfaldlega að bíða í önnur tvö ár eftir því að endurheimta ökuréttindin.   

En hafi áfengismagnið mælst vel undir tveimur prómillum, ekkert slys orðið, brotið er það fyrsta og sá brotlegi á sér ekki sögu misnotkunar á áfengi, getur viðkomandi sótt um að endurheimta ökuréttindin eftir eins árs sviptingu gegn því að áfengisræsivörn verði í bíl hans.

En meginskilyrðin fyrir að endurheimta ökuréttindin eftir annarsvegar tvö ár eins og í fyrra dæminu og eftir eitt ár í því síðara, eru þau að áfengi í blóði eftir fyrsta brot hafi ekki farið yfir tvö prómill og eftir annað brot ekki yfir 1,2 prómill. Að öðrum kosti er fátt annað en ævilöng svipting í boði.