-Er að verða of seinn á Bessastaði að taka við fálkaorðunni

Fólk sem lögregla hefur stöðvað fyrir umferðarbrot hefur stundum uppi ýmsar afsakanir og sumar þeirra æði sérkennilegar. Ein þeirra frumlegustu er vafalaust sú sem ungur maður viðhafði eftir að hafa verið stöðvaður á Hafnarfjarðarveginum fyrir mjög hraðan akstur: -Ég er að verða of seinn á Bessastaði til að taka við fálkaorðunni.

 En algengar afsakanir við of hröðum akstri eru td: -ég tók ekki eftir skiltinu um hámarkshraða. – Hraðamælirinn í bílnum er bilaður. – Ég er mjög góður bílstjóri og ræð vel við þetta og get stöðvað á punktinum ef einhver hætta er. – Af hverju tókuð þið ekki bílinn sem tók fram úr mér. Hann fór miklu hraðar en ég. - Ég var að flýta mér á bráðamóttöku með konuna mína.

Þegar árekstur hefur orðið þar sem annar bíllinn virti ekki regluna um forgang umferðar frá hægri eða virti ekki stöðvunar- eða biðskyldu eða fór yfir gatnamót á rauðu ljósi er viðkvæðið gjarnan: -Ég sá ekki umferðarmerkið. –Umferðarljósið var grænt. – Ég hélt ég væri á aðalbraut. –Sólin blindaði mig.

Umferðardeild lögreglunnar á einni af hverfislögreglustöðvum Stokkhólmsborgar hefur tekið saman lista yfir skýringar brotafólks og hér á eftir eru nokkur gullkorn:

 

Of hraður akstur

   -Ég er að flýta mér á tónleika með Paul McCartney. (Voru á dagskrá viku síðar).

   -Það er fáránlegt að sekta mig þar sem ég er á umhverfismildum bíl.

   -Takiði frekar þann sem tók fram úr mér. Hann fór miklu hraðar en ég.

Öryggisbeltið óspennt 

   -Ég er 43 ára og ræð, fjandinn hafi það, sjálfur hvað ég geri.

Stönsuðu ekki fyrir gangandi úti á miðri  gangbraut.

   -Ég sá konuna bara alls ekki.

   -Þið eruð verri en öryggislögregla Saddams Husseins var. Ég fer heim aftur um leið og kanarnir eru farnir. (Íraksættaður leigubílstjóri)

Tóku bannaða vinstri beygju

   -Hvernig átti ég að sjá skiltið með vörubíl fyrir framan mig?

   -Þú ert fyrsta konan í 20 ár sem biður um símanúmerið mitt.

   -Auðvitað er ég reiður. Ég er búinn að keyra leigubíl í 20 ár og þið hafið marg sektað mig fyrir að taka bannaða vinstri beygju og fyrir að aka yfir heila óbrotna línu milli akreina í gagnstæðar áttir. Er ekki kominn tími til að þið hættið að sekta mig. Hafiði ekki fengið nóga peninga frá mér?

 Ekið á strætóakrein

   -Já, en hefði ég séð skiltið hefði ég auðvitað ekki keyrt hér. Þú hlýtur að skilja það.

   -Ég veit ekki til þess að þetta sé strætóakrein. Hver hefur ákveðið það og hvenær. Þetta var ekki strætóakrein í síðustu viku.

Ölvaðir ökumenn

   -Ég hef ekki drukkið dropa af áfengi en borðað poka af súkkulaðirúsínum. Sérðu ekki hvað maginn á mér er uppbelgdur.

   -Ég get ekki rætt þetta við menn á miklu lægra vitsmunastigi en ég.