Fiat 500 flýtt

Fiat 500 hinn nýi.

Fiat hefur tilkynnt að frumsýningunni á hinum nýja Fiat 500 sem fullklárum framleiðslubíl verði flýtt. Gert hafði verið ráð fyrir að hann yrði kynntur bílablaðamönnum undir lok ársins en þess í stað fer sú kynning fram þann 4. júlí nk. Á þeim degi verða nákvæmlega 50 ár frá því að fyrsti Fiat 500 bíllinn var kynntur blaðamönnum. Mikið húllumhæ verður þá í Torino á N. Ítalíu við höfuðstöðvar Fiat.

Fiat hefur að undanförnu verið að þróa nýjar bílvélar, m.a. tveggja strokka vél fyrir smábíla sem búist var að yrði í fyrstu nýju 500 bílunum. Samkvæmt fregnum frá Torino nú lítur ekki út fyrir að þetta gangi eftir heldur verði tvær gerðir bensínvéla í bílunum; sú minni 1,2 l og 69 ha. og sú stærri 1,4 l og allt að 100 hö. Ennfremur verði í boði 1,3 lítra, 75 ha. dísilvél sem m.a. er í Suzuki Swift, Wagon-R+, Opel Corsa og fleiri bílum.

Gamli Fiat 500 er nú talsvert eftirsóttur sem safngripur og meðal þekktra manna sem eiga og hafa gamla Fiat 500 í talsverðum metum eru Ómar Ragnarsson og Michael Schumacher. Bíll Ómars hefur verið til sýnis í sýningarsal Fiat-bílaumboðsins Sögu að Malarhöfða 2a að undanförnu.

Nýi Fiat 500 er byggður á tækni og á grunnplötu frá Fiat Panda og eru bílarnir mjög svipaðir að stærð, eða 3,55 metra langir og 1,65 m breiðir. Vélarnar sem verða (í það minnsta í fyrstunni) í hinum nýja Fiat 500 eru sömuleiðis þær sömu og í Panda þannig að talan 500 á ekki lengur við rúmtak vélarinnar eins og var í gamla daga.

Hinn nýi Fiat 500 verður fremur lífsstílsbíll en ódýr og íburðarlaus smábíll fyrir févana fólk eins og sá gamli var upphaflega hugsaður. Hann mun að því leyti sverja sig í bræðralag með öðrum slíkum bílum, eins og t.d. hinum nýja Mini og nýju VW Bjöllunni. Erlend bílablöð segja að verðið verði eilítið hærra en á Pöndunni, en alls kyns búnaður, þar með talinn öryggisbúnaður, verði lika ríkulegri í Fiat 500 en Panda. Byrjað verður að selja Fiat 500 í heimalandinu Ítalíu fljótlega etir frumsýninguna en búist er við honum til Danmerkur og Íslands síðar, eða í kringum áramótin næstu.