Flest slys og óhöpp verða á gatnamótum Miklubrautar og Kringlumýrarbrautar

 Flest slys og óhöpp verða á gatnamótum Miklubrautar og Kringlumýrarbrautar. Þar á eftir eru annars vegar tvö önnur stór gatnamót við Miklubraut (Háaleitisbraut og Grensásvegur) og hins vegar þrjú gatnamót eða hringtorg í Hafnarfirði; Hringtorg Flatahraun / Fjarðarhraun / Bæjarhraun, hringtorg Reykjanesbraut / Lækjargata og gatnamót við Kaplakrika (Reykjanesbraut / Fjarðarhraun). Þetta kemur fram í skýrslu Samgöngustofu um umferðarslys á Íslandi árið 2018.

 Þegar kemur að slysum með meiðslum eru gatnamót Miklubrautar og Kringlumýrarbrautar einnig með flest slys. Þar á eftir eru svo gatnamót Reykjanesbrautar og Bústaðavegar, gatnamót Miklubrautar og Grensásvegar og gatnamót Miklubrautar og Háaleitisbrautar. Slæma vegkafla utanbæjar má annars vegar skoða út frá því hvar flest slys verða (m.v. lengd kaflans) og hins vegar hvar hæsta slysatíðnin er, þ.e. hvar flest slys verða m.v. umferðarmagn (og lengd kaflans).

Í skýrslunni kemur fram að af litið er til þeirra staða þar sem flest slys og óhöpp verða sjáum við að versti kafli landsins er stuttur kafli norðan Hvalfjarðarganga að hringtorgi. Sá kafli er aðeins 480m en á honum áttu sér stað 23 slys og óhöpp síðustu fimm árin. Lendir þessi kafli því efst á blaði bæði vegna þess hve mörg atvik eiga sér stað en einnig vegna þess hve stuttur hann er. Á eftir honum kemur svo annar stuttur kafli, kaflinn frá Leifsstöð að hringtorgi.

Ef skoðað er hvar flest slys með meiðslum eiga sér stað m.v. lengd kaflans, þá sjáum við kaflann sem er í öðru sæti yfir slys og óhöpp; kaflann frá Leifsstöð að hringtorgi. Flestir verstu kaflarnir hvað þetta varðar eru vegirnir út frá höfuðborgarsvæðinu, enda er þar mesta umferðin. Þegar skoðuð er slysatíðni, þ.e. hvar flest slys verða m.v. ekna km um veginn fást allt aðrir vegkaflar en þegar aðeins skoðaður slysafjöldi. Flest slys og óhöpp m.v. ekna km (sem er fjöldi bíla sinnum lengd vegkafla) verða á Hróarstunguvegi á Fljótsdalshéraði. Þar urðu 27 slys og óhöpp á fimm árum á 9,2km löngum kafla þar sem 74 bílar aka um að jafnaði yfir árið.

Næstu vegir þar á eftir hvað þetta varðar samkvæmt skýrslu Samgöngustofu eru Vattarnesvegur sunnan Reyðarfjarðar og Jökuldalsvegur á Fljótsdalshéraði. Því eru þrír verstu vegkaflarnir hvað þetta varðar allir á Austurlandi. Hvað varðar flest slys með meiðslum m.v. ekna km þá er Heydalsvegur (nyrðri helmingur hans) sá versti. Þar á eftir er 5 km kafli Norðfjarðarmegin við Norðfjarðargöng og vegurinn um Öxi.