Furðulegar skýringar N1 vegna oftöku á bensínsköttum

Í kjölfar lækkunar olíufélaganna á bensíni vegna oftekinna gjalda og skatta kom fram á heimasíðu N1 að félagið hefði innheimt um það bil 9 milljónir króna í bensínskatt á 10 dögum frá 29. maí til 8. júní.  Þessa fjármuni sagðist félagið hafa ákveðið að „gefa“ til góðra málefna.   

Þessar 9 milljónir vöktu athygli því samkvæmt ársreikningi Flutningsjöfnunarsjóðs olíuvara fyrir árið 2008 var markaðshlutdeild N1 í bensínsölu 32,4%.  Meðalsala á bensíni var um 574 þúsund lítrar á dag.  Ef dagssalan er margfölduð með 10 dögum og 12,5 krónum þá er niðurstaðan um 71, 8 milljónir króna sem ofteknar voru af bensínkaupendum.  Út frá þessum tölum ætti N1 að skila til viðskiptavina sinna a.m.k. 23 milljónum króna.  Þessar tölur miða við meðalsölu árs en á þeim tíma sem oftakan átti sér stað var hvítasunnuhelgi sem er ein stærsta ferðahelgi ársins.

Morgunblaðið var með frétt um þessa misvísun hjá N1 í fyrradag.  Í Morgunblaðinu í dag var Hermann Guðmundsson forstjóri N1 spurður um það hvers vegna fyrirtækið hafi aðeins ætlað að greiða 9 milljónir króna til góðgerðarmála vegna oftekinna bensínskatta?  Hermann svaraði:  „Við erum auðvitað einnig með tugþúsundir af reikningshafandi viðskiptavinum og þeir hafa engan reikning fengið ennþá.  Við erum að vinna í því núna að bakfæra og leiðrétta það.  Þess vegna var upphæðin ekki hærri – það eru svo margir sem eru með reikning hjá okkur og greiða  því eftir á.  Það verður lagfært.  Aðeins 9 milljónir voru innheimtar á mánudaginn.  Það er prinsippmál að það verði ekki ein króna af ofteknum gjöldum eftir hjá félaginu.“ 

Þessi eftir á skýring er furðuleg.  Hversvegna reiknaði N1 ekki með öllum ofteknu sköttunum fyrr en eftir að Morgunblaðið vakti athyli á þessari misvísun?  Á heimasíðu N1 þann 9. júní þá var ekkert fjallað 14 til 16 milljónirnar sem ofteknar voru af reikningsviðskiptavinum en aðeins sagt að N1 hefði ákveðið að gefa á annarra kostnað 9 milljónir króna til góðgerðarmála!

Við skulum vona að svona uppákoma hendi ekki aftur.