Fyrsta skoðun bíla eftir 4 ára notkun

Danskt bílaskoðunarfyrirtæki sem heitir Applus+ Bilsyn hefur tekið saman tölulegar upplýsingar um niðurstöður fyrstu öryggisskoðunar á bílum. Fyrsta skoðun bíla í Danmörku fer fram þegar bílarnir hafa verið fjögur ár í notkun frá nýskráningu. Um 500 þúsund bílar voru skoðaðir í fyrsta sinn árið 2011 og sú tegund og gerð sem fæstar athugasemdir fengu reyndist vera Volvo C30 með 9,6 athugasemdir á hverja 100 bíla.

Volvo C30 er fyrsti bíllinn sem nær þeim árangri að fá færri 10 athugasemdir á hverja 100 skoðaða bíla. Athygli vekur að japönsku bílarnir sem lengi hafa verið einna minnst bilanagjarnir hafa látið undan síga fyrir hinum evrópsku. Evrópsku tegundirnar Volvo, Volkswagen og Audi sitja nú í efstu sætunum. Fæstar athugasemdir eru gerðar við þá í skoðun og þeir virðast því orðnir öruggastir í rekstri og minnst bjarnir á að bila. Á lista Applus+ Bilsyn nú eru Volvo bílar í tveimur efstu sætunum. Mazda frá Japan kemur inn í þriðja sætið.

Þegar niðurstöðurnar nú eru bornar saman við niðurstöður fyrri ára sést að bílarnir hafa stöðugt verið að batna og athugasemdum hefur farið fækkandi. Árið 2010 var Volvo S40 í efsta sætinu með 10,4 athugasemdir á hverja 100 bíla. Árið 2009 var Ford Fusion í efsta sætinu með 16,8 athugasemdir á hverja 100 bíla.

Framkvæmdastjóri skoðunarfyrirtækisins sýni að bílaframleiðendur  skili frá sér stöðugt vandaðri bílum. Að bíll skuli nú fá minna en 10 athugasemdir á hverja 100 bíla sé talsverður merkisatburður sem Volvo framleiðandinn megi vera stoltur af. En samantektin sýni líka að bæði franskir og kóreskir framleiðendur mættu taka sig á. Þeir séu búnir að hjakka í svipuðu fari undanfarin ár. Nú sýnir það sig að 20 af þeim 25 tegundum sem verma neðstu sætin eru einmitt bílar frá Frakklandi og Kóreu. Sá bíll sem skipar neðsta sætið er Chevrolet Nubira frá Kóreu með 58,7 athugasemdir á hverja 100 skoðaða bíla.

Algengustu athugasemdir sem eru gerðar við eftir fyrstu fjögur árin í „lífi“ bílanna tengjast bilunum í rafkerfi, ljósum, hemlum og í burðarvirki.

4 ára gamlir fólksbílar skoðaðir 2011