Næstum helmingur bíla í Osló er rafknúinn

Næstum allir nýir fólksbílar sem seldir eru í Noregi í dag eru rafknúnir. Samt eru enn aðeins um 30 prósent af fólksbílaflotanum rafknúin. Flestir aka því enn um á bíl með dísil- eða bensínvél, eða einhvers konar tvinnbíl.

Ef dreifingin um landið er skoðuð nánar, kemur í ljós að mikill svæðisbundinn munur er. Á meðan næstum helmingur bíla í Osló er rafknúinn, er hlutfall rafbíla aðeins 8,3 prósent í Finnmörk. Það þýðir að aðeins tólfti hver bíll í Finnmörk gengur fyrir rafmagni. Þetta sýna nýjar tölur frá Hagstofu Noregs (SSB).

Næstneðst kemur Innlandet með 14 prósent. Þar á eftir fylgja Troms með 16 prósent og Nordland með 17 prósent.

Tölfræðin sýnir að Osló hefur langhæsta hlutfall rafbíla, með heil 48 prósent rafknúinna fólksbíla árið 2024. Akershus er í öðru sæti með 35 prósent, á meðan Vestland-fylki hefur 33 prósent rafbíla og Rogaland 29 prósent.

Óttast gjaldahækkun á bensíni og dísilolíu

Norski Miðflokkurinn hefur vakið athygli á þessum tölum í nokkrum dagblaðagreinum síðustu daga, vegna þess að Stórþingið boðar hertar aðgerðir í loftslagsmálum.

Meirihluti, sem samanstendur af Verkamannaflokknum, Hægriflokknum, Sósíalíska vinstriflokknum, Rauð, Venstre, Umhverfisflokki græningja og Kristilega þjóðarflokknum, vill nefnilega útvíkkun á lögum um losunarheimildir, sem Miðflokkurinn telur að muni leiða til verulega dýrara bensíns og dísilolíu . Miðflokkurinn telur að muni sérstaklega bitna á þeim svæðum þar sem jarðefnaeldsneytisbíllinn stendur enn sterkt.

Leiðtogi Miðflokksins, Trygve Slagsvold Vedum, óttast að dísilolía og bensín verði brátt mun dýrari, vegna hertra aðgerða í loftslagsmálum.

,,Það sem við bregðumst svo harkalega við núna er að Verkamannaflokkurinn og Hægriflokkurinn horfa ekki á hvernig gjaldahækkun kemur út. Það eru flestir með lágar tekjur, sem eiga gamlan bíl og oftast ekki rafknúinn. Og það eru þeir sem búa á minni stöðum, þar sem þeir eru algjörlega háðir bílnum, sem þurfa að borga reikninginn,“ segir hann.

Að sögn Miðflokksins gæti bensínið til lengri tíma litið hækkað um 6,54 norskar krónur og dísilolían um 7,49 norskar krónur, með útvíkkun laga um losunarheimildir

Búist er við að hertar aðgerðir í lögum um losunarheimildir verði samþykktar á Stórþinginu á næstu dögum.