Ný túrbínudísilvél fyrir Volvo C70

Volvo C70 - nú með dísilvél.

Volvo er um þessar mundir að auka vélaúrvalið í C70 gerðinni. Nýjasta viðbótin er fjögurra strokka tveggja lítra túrbínudísilvél. Hún verður jafnframt fyrsta fjögurra strokka vélin í þessum opnanlega sportbíl Volvo.

Frederik Arp forstjóri Volvo segir í fréttatilkynningu frá fyrirtækinu að með nýju vélinni sé verið að koma til móts við kaupendur og hann er þess fullviss að nýja dísilvélin muni verða í allt að 20% allra seldra C70 bíla af 2008 árgerð. „Þessi nýja dísilvél mun verða mjög vinsæl því hún gefur góða blöndu af akstursánægju og hagkvæmni,“ segir forstjórinn.

Áætlun um ársframleiðslu dísilútgáfu C70 er þó varfærnari en forstjórinn segir því hún gerir ráð fyrir að á næsta ári verði byggðir tvö þúsund C70 2,0 dísilbílar. Það þýðir miðað við núverandi framleiðslu að 10. hver C70 verður með dísilvélinni. Frumsýning dísilútgáfunnar verður að öllum líkindum á bílasýningunni í Frankfurt í sept. nk.

Nýja dísilvélin er af annarri kynslóð dísilvéla með samrásarinnsprautun. Hún er 100 kW (136 ha.) og vinnsla hennar er 320 Newtonmetrar. Eyðsla í blönduðum akstri samkvæmt evrópskri staðalmælingu er 6,1 l / 100 km. Hún kemur bílnum í hundraðið úr kyrrstöðu á 11 sek. Og hámarkshraðinn er 205 km / klst. Öragnasía á útblásturskerfinu með sjálfvirkum hreinsibúnaði er staðalbúnaður.