Toyota rifar seglin í Japan

Reuters fréttastofan greinir frá því að Toyota Motor Corp ætli að draga úr ársframleiðslunni í heimalandinu Japan um 10 prósent niður í 3,1 milljón bíla frá og með 2014. Niðurskurðurinn er þegar hafinn. Ekki er ætlunin að segja upp fólki í stórum stíl, heldur einungis ráða ekki nýtt fólk í stað þeirra sem láta af störfum.

Áður en fjármálakreppan sem heimurinn er enn að bíta úr nálinni með, skall á, framleiddi Toyota árlega 3,9 milljónir bíla í Japan. Erfiðleikar bílaframleiðslunnar í Japan nú eru ekki síst vegna þess hve gengi japanska yensins er hátt. Framleiðslan flyst því úr landi til ríkja sem búa við annað og lægra verðlag.