Volvo greiðir „skilagjald“ þegar keyptur er nýr bíll

Þegar Svíi kaupir sér nýjan Volvo Flexifuel-bíl (bíl sem getur gengið á 85 prósenta etanóleldsneyti, þá greiðir Volvo manneskjunni rúmar 100 þúsund krónur ef gamla bílnum er eytt. Ef keyptur er dísil-Volvó þá greiðir Volvo rúmar 60 þúsund ísl. krónur sé gamla bílnum eytt. Þetta sérstaka skilagjald Volvo er til viðbótar við hið opinbera skilagjald í Svíþjóð sem er rúmar 100 þúsund krónur.

Með þessu sérstaka skilagjaldi sínu vill Volvo stuðla að betra umhverfisástandi og meira öryggi á vegum úti. Volvo-skilagjaldið er óháð aldri, tegund og gerð gamla bílsins. Eina skilyrðið er að hann sé afskráður hjá löggiltri bílaendurvinnslu.

Sá sem kaupir sér nýjan Volvo Flexifuel getur þannig reknað með því að fá samtals jafngildi rúmlega 200 þúsund íslenskra króna í hendurnar við kaupin sem gengur þá upp í verð nýja Flexifuel-bílsins. Til viðbótar eru ýmis „græn“ tilboð í gangi hjá Volvo að því er segir í frétt frá Volvo í Gautaborg og í þeim er möguleiki á því að krækja sér í enn einn hundraðþúsundkallinn til viðbótar.

Sala á umhverfismildum bílum í Svíþjóð hefur stöðugt aukist á nýliðnu ári, en þrátt fyrir það er meðalaldur bíla í Svíþjóð einn sá hæsti í Evrópu að því er segir í frétt Auto Motor & Sport í Svíþjóð.