Aukin álagning á eldsneyti kostar neytendur hátt í 2 milljarða króna

Olíufélögin hafa ekki skilað verðlækkun olíu á heimsmarkaði til neytenda á Íslandi.  Svo sem sjá má á línuritinu sem fylgir þessari frétt þá hefur álagning olíufélaganna á bensín og dísilolíu hækkað verulega á milli ára.  Uppreiknað til verðlags í dag þá er meðaltalshækkun álagningar á bensíni ríflega 5 krónur á hvern lítra sem gerir 6.60 krónur á hvern lítra með virðisaukaskatti.  Þessi hækkun álagningar á bensíni kostar neytendur yfir árið 1.300 milljón krónur.  Hækkun álagningar á hvern dísilolíulítra er ríflega 3 krónur eða 4.20 krónur með vsk.  Aukin dísilálagning mun kosta neytendur ríflega 600 milljón krónur yfir árið.

 Uppreiknuð álagning á dísilolíu í síðustu viku er ríflega 10 krónum hærri á hvern lítra samanborið við meðalálagningu fyrir allt árið 2008.  Þessi hækkun álagningar nú á aðventunni í kjölfar hækkunar eldsneytisskatta er alls ekki forsvaranleg.   Í liðinni viku var kostnaðarverð dísilolíu um 16.40 kr. hærra en kostnaðarverð hvers bensínlítra.  Á sama tíma var útsöluverðið frá dælu á Íslandi 24.40 kr. hærra.  Að teknu tilliti til virðisaukaskatts þá borga dísilbílaeigendur um 5 kr. hærri álagningu á hvern lítra nú í desember samanborið við bensínneytendur.