Bílatryggingar skila fáheyrðum hagnaði

Síðastliðin þrjú ár hafa lögboðnar bílatryggingar skilað tryggingafélögunum 7,8 milljarða króna hagnaði. Þá er eingöngu verið að tala um hagnað af iðgjaldagreiðslum, ekki af fjármagnstekjum.

Þessi fáheyrði hagnaður rímar illa við síendurteknar fullyrðingar tryggingafélaganna um viðvarandi tap á bílatryggingum. Félögin vísa oft til þess sem kallast samsett hlutfall, en það er hlutfall kostnaðar á móti tekjum. Hlutfall yfir 100% sýni tap af tryggingastarfseminni. Á síðasta ári – 2024 – var þetta hlutfall 87% og hagnaðurinn 4,6 milljarðar króna. Árið 2023 var hlutfallið 92% og 2022 var það 98%.

Nýlega fullyrti hagfræðingur Samtaka fjármálafyrirtækja, SFF, að á Íslandi væri viðvarandi tap af vátryggingastarfsemi. Taldi hann það til marks um mikla samkeppni.

Bílatryggingar eru stærsti hluti skaðatrygginga eða 60% og því viðeigandi að líta til þeirra. Vandséð er hvernig 7,8 milljarða króna hagnaður verður rakinn til mikillar samkeppni. Miklu frekar lítur það út eins og samantekin ráð tryggingafélaganna um að viðhafa enga samkeppni til að hafa sem mest upp úr skyldutryggingum ökutækja.

Tapað á kaskótryggingum

Umrædd samkeppni á sér reyndar stað hinum megin við þilið. Tryggingafélögin „slást“ um kaskótryggingar ökutækja af svo miklum krafti að þau hafa tapað 4,6 milljörðum króna á þeim síðastliðin þrjú ár. Sá rekstur ber ekki vott um mikið viðskiptavit stjórnenda félaganna en þar er líklega um hina meintu samkeppni að ræða.

Gagnvart bíleigendum lítur málið þannig út að iðgjöld skyldutrygginganna eru notuð til að borga tapið af tryggingum sem enginn er skyldugur til að kaupa.

Sjá einnig FÍB kvartar til Samkeppniseftirlitsins