Borgin að ranka við sér?

Verja á um 232 milljónum króna til viðbótar til viðhalds gatna í Reykjavík í ár miðað við í fyrra. Áætlað er að 13-14 þúsund tonn af malbiki fari til viðhalds og viðgerða á götum borgarinnar og kostnaðurinn talinn verða 690 milljónir króna miðað við 458 milljónir á síðasta ári. Þetta kemur fram á fréttavefnum Vísir.is

Þetta eru ekki slæmar fréttir og gleðilegt að gagnrýni, m.a. frá FÍB á mjög slæmt ásigkomulag gatna í borginni hafi nú loks ýtt það vel við borgaryfirvöldum að þau hyggist

loks hefjast handa við úrbætur. FÍB hefur hefur gert alvarlegar athugasemdir við ástandið og að því er virðist viljaskort kjörinna fulltrúa borgarbúa til úrbóta og áhuga þeirra á að hygla fremur annarskonar umferð en bíla um hina víðlendu og dreifðu borg. Fjallað var ítarlega um ástand samgöngukerfis borgarinnar í síðasta tölublaði FÍB blaðsins og hið sama er aftur gert í nýjasta tölublaðinu sem nú er verið að dreifa til félagsmanna FÍB og annarra áskrifenda þess. Þá hefur ítrekað verið fjallað um þessi mál að undanförnu hér á fréttavef FÍB, t.d. hér.