Corolla ennþá mest seldi bíll veraldar

Toyota Corolla.

Þrátt fyrir lítilsháttar sölusamdrátt fyrstu fjóra mánuði þessa árs þá er Toyota Corolla enn mest seldi bíll í veröldinni og langt bil milli Corolla og þeirra bíla sem næstir koma í baráttunni um „heimsmeistaratitilinn,“ Þeir eru VW Golf og Ford F-línan.

Allar þessar þrjár bíltegundir og –gerðir eiga sér langa forsögu. Lengst er hún um Ford F-pallbílana en framleiðslan á þeim hófst árið 1948. Fyrsta Corollan birtist svo árið 1966 og var hún harla ólík nútíma-Corollunni og miklu minni bíll. Yngstur er VW Golfinn en hann kom fram vorið 1974 og leysti gömlu Bjölluna af hólmi.  

Þessar upplýsingar er að finna á tölfræðivefnum focus2move.com en á honum er haldið utan um hverskonar tölfræði sem tengist bílum og bílaiðnaði. Tölurnar um mest seldu bíla heimsins eru unnar úr nýskráningartölum yfir 2700 gerðir bíla á 140 helstu bílamarkaðssvæðum heimsins. Bílarnir sem tölurnar ná til eru fólksbílar og minni sendi- og pallbílar og þær sýna að á fyrstu fjórum mánuðum ársins jókst sala í heiminum á fólksbílum og léttum sendi- og pallbílum um 2,7 prósent og varð 30,3 milljónir bíla.

Athygli vekur hversu góðs gengis hin nýja kynslóð Toyota RAV4 nýtur en bíllinn hefur á tímabilinu selst meir en bæði Honda CR-V og Toyota Camry. Þá hefur ný kynslóð Honda Civic greinilega slegið í gegn og hækkað um heil átta sæti miðað við sama tíma í fyrra. Honda Civic er nú næst mest seldi fólksbíll í Bandaríkjunum á eftir Toyota Camry.  

Á listanum yfir 15 mest seldu bílategundir og –gerðir eru sum heiti bílanna ókunnugleg. Í 11. sætinu er t.d. Volkswagen Lavida sem er kínversk útgáfa VW Passat. Í 10. sæti er Wuling Hong Guang en það er fjölnotabíll sem General Motors framleiðir í Kína. Hann er með þremur sætaröðum og er sami bíll og kallast Chevrolet Enjoy í Indlandi.  

15 mest seldu bílagerðir heims janúar-apríl 2016 í þús. eintaka