Endurgreiðsla á virðisaukaskatti nái einning til bílaviðgerða
Ef breytingartillögur efnahags- og viðskiptanefndar Alþingis við stjórnarfumvarp um aðgerðapakka til að mæta efnahagslegum áhrifum í kjölfar heimsfaraldurs kórónuveiru nær fram að ganga mun endurgreiðsla á virðisaukaskatti ekki aðeins ná til framkvæmda við íbúðir og sumarhús heldur einnig til bílaviðgerða. Í umfjöllun í Morgunblaðinu um málið er haft eftir Óla Birni Kárasyni, formanni nefndarinnar, að þetta sé skref í rétta átt
„Þetta er skref í rétta átt. Málið kemur aftur til kasta ríkisstjórnarinnar og Alþingis innan ekki margra vikna. Við þurfum að gera meira, það er alveg klárt,“ segir Óli Björn Kárason, formaður nefndarinnar. Frumvarpið er um breytingar á ýmsum lögum til að milda áhrif höggsins á fyrirtæki og heimili.
Allir nefndarmenn stjórnar og stjórnarandstöðu stóðu að málinu en stjórnarandstæðingar með efnislegum fyrirvörum. Nefndin gerði fjölda breytingartillagna enda hefur útlitið dökknað frá því frumvarpið var lagt fram.
Meðal tillagna er að gefinn er meiri sveigjanleiki í frestun á gjalddögum staðgreiðslu og tryggingagjalds að því er fram kemur í umfjöllun um mál þetta í Morgunblaðinu í dag.