F-pallbíllinn er vinsælasti bíll Bandaríkjanna

Bandaríkin eru sannarlega mesta pallbílaland heimsins. Ekki einu sinni heimsmarkaðsverð eldsneytis á hverjum tíma virðist geta neinu breytt um það.

Ef bensínverðið lækkar eykst salan á stærstu pallbílunum og ef það stígur í hæstu hæðir kaupa Bandaríkjamenn bara minni pallbíla. Og eins og fjöldamörg undanfarin ár eru Ford F-pallbílarnir lang vinsælastir pallbíla en ekki bara það; heldur líka er Ford F söluhæsti bíll Bandaríkjanna og hefur verið það árum saman.

Þrjár mest seldu bíltegundirnar í Bandaríkjunum eru sem sagt allar pallbílar. Þar trónir Ford F í efsta sætinu. Næstur er Chevrolet Silverado og í þriðja sæti er Ram Pickup frá Chrysler.

Allir eru þessir bílar bandarískir í húð og hár og byggðir samkvæmt eldgömlu hefðinni sem er sú að burðarvirkið er stálgrind. Í henni er komið fyrir vél, gírkassa, drifi og hjólabúnaði. Ofan á grindina er svo yfirbyggingin skrúfuð föst. Svona var þetta gert í upphafi bílaaldar. Svona var það gert þegar fyrsta kynslóð F- pallbílalínunnar frá Ford kom fyrst fram árið 1948 og svona er þetta enn gert í grundvallaratriðum að því undanteknu með Ford F, að nú er yfirbyggingin smíðuð úr áli.

Núverandi kynslóð Ford F-línunnar er sú 13. síðan 1948 og sú vinsælasta til þessa. Söluaukningin fyrstu sjö mánuði ársins miðað við sama tímabil í fyrra varð 8,8 prósent. Velgengni Ford F pallbílalínunnar á sinn þátt í því að Ford er nú mest selda bíltegundin í Bandaríkjunum og komin fram úr Toyota. GM er svo í þriðja sæti.

En þegar það er skoðað hvers konar gerðir bíla sést að pallbílar eru uppáhaldið síðan koma hefðbundnir fólksbílar og jeppar og jepplingar. Þeir raðast í 4-11. sæti og eru allir japanskir að uppruna eins og sjá má af töflunni. Bílarnir í 12-15 sæti eru svo bandarískir.

Vinsælustu bílarnir í Bandaríkjunum: