Fjármálaráðuneytið hafnar áskorun FÍB

Félagi íslenskra bifreiðaeigenda var að berast bréf frá fjármálaráðuneytinu undirritað af starfsmönnum fjármálaráðuneytisins fyrir hönd ráðherra.  Með bréfinu hafnar ráðuneytið áskorun FÍB um lækkun skatta á bifreiðaeldsneyti. 

FÍB væntir þess að erindi félagsins hafi verið tekið til efnislegrar meðferðar á vettvangi ríkisstjórnarinnar þó að af svarbréfinu virðist sem það hafi eingöngu verið tekið fyrir á vettvangi fjármálaráðuneytisins.  

FÍB skoraði á stjórnvöld að koma til móts við fólkið í landinu og lækka skatta á eldsneyti nú þegar heimsmarkaðsverð á bensíni og dísilolíu er í sögulegu hámarki.  Það eru vonbrigði að ráðuneytið hyggist ekki beita sér fyrir lagabreytingu í þá veru sem FÍB óskaði eftir.

Málinu er ekki lokið því nú þegar hafa hátt í 8 þúsund tekið undir áskorun FÍB til stjórnvalda um lækkun skatta á eldsneyti á heimasíðu félagsins www.fib.is.

Í þessum mánuði mun FÍB ítreka áskorun sína til ríkisstjórnarinnar og leggja fram lista með nöfnum þeirra sem taka undir málstað félagsins um að dregið sé úr ofursköttum stjórnvalda á eldsneyti og þar með bíla og umferð hér á landi.

 

Svar fjármálaráðherra:

http://www.fjarmalaraduneyti.is/frettir/frettatilkynningar/nr/4480