Gamir bílaforstjórar

Bílaframleiðslugeirinn í heiminum er mikið karlaveldi og þeir sem þar ráða mestu eru karlar, karlar sem eru heldur engin unglömb. Meðalaldur forstjóranna sem hér eru taldir er 57 ár. Yngsti forstjórinn er hinn sænski Christian von Koenigsegg, sem myndin er af. Hann er einungis fertugur. Næst yngstur er Elon Musk forstjóri Tesla. Hann er 41 árs. Sá elsti í upptalningunni er 74 ára. Það er Chung Mong-koo forstjóri Hyundai. Það er tímaritið Auto Motor & Sport sem tekið hefur þetta saman.  

Það hefur lengi verið haft fyrir satt að það séu fyrst og fremst karlar sem áhuga hafa fyrir bílum og það séu yfirleitt karlarnir sem ákveði bílakaup innan fjölskyldunnar. Bíllinn sé innan áhugasviðs karlsins og á hans sérsviði. Það er hins vegar alls ekkert víst að þetta sé svona í raun. Hlutur kvenna í bílakaupum almennings er nefnilega mjög stór og stækkandi. Því má segja að það sé talsvert sérkennilegt að á meðal þeirra 52 forstjóra sem hér eru taldir er engin einasta kona.

Bílar eru sumpart tískuvarningur og stundum er einstökum gerðum þeirra ætlað að höfða fremur til kvenna en karla og stundum frekar til ungra kaupenda en eldri, og stundum til ráðsettra og stöndugra kaupenda. En bílaforstjórarnir sem vilja með bílum sínum höfða til unga fólksins eru margir hverjir komnir vel á efri ár, en auðvitað getur vel verið að þeir séu ungir í anda, jafnvel þótt þeir séu komnir langt yfir hinn lögbundna eftirlaunaaldur.