Geely sækir inn á alþjóðlegan markað leigubíla

LEVC TX rafmagnsleigubíllinn.

Kínverski bílaframleiðandinn Geely sem er aðaleigandi Volvo, keypti fyrir fáum árum London Taxi Company, framleiðanda Lundúnaleigubílanna heimsþekktu. Nú ætlar Geely að sækja inn á heimsmarkað leigubíla með rafknúinn Lundúnaleigubíl. Af því tilefni hefur verið skipt um nafn á fyrirtækinu og heitir það nú LEVC sem er skammstöfun á London Electric Vehicle Company.

Hinn nýi alþjóðlegi Lundúnaleigubíll kallast TX og byggðar hafa þegar allmargar frumgerðir af honum og ítarlegar prófanir á þeim þegar farið fram, aðallega í Bretlandi. Þar sem bíllinn verður, eins og gamli Lundúnaleiguvagninn hefur verið alla tíð - handbyggður að mestu leyti, svipað og Rolls Royce og fleiri, og þannig ekki um eiginlega fjöldaframleiðslu á færibandi að ræða. Hann verður framleiddur að mestu eftir pöntunum og byrjað verður formlega að taka við pöntunum á honum í ágústmánuði nk. Það er þó ekki alveg svo því að nú þegar er LEVC byrjað að byggja 325 bíla fyrir hollenska leigubílaútgerð sem heitir RMC. Þá á að taka í notkun strax á næsta ári.

TX leigubíllinn er rafknúinn en með innbyggðri bensínrafstöð sem fer sjálfvirkt í gang þegar lækkar á geymunum. Drægi hans á rafgeymunum einum er rúmlega 160 kílómetrar og á honum eru tenglar svo stinga má honum í samband við venjulega raftengla og hraðhleðslustöðvar.
TX er ætlað að taka alfarið við af gömlu dísilknúnu Lundúnaleigubílunum sem hætt verður að framleiða nú.

-SÁ