Olíugjaldið lækkað um 4 krónur

Geir H. Haarde fjármálaráðherra.
FÍB fagnar lagafrumvarpi fjármálaráðherra um fjögurra króna lækkun á olíugjaldi á dísilolíu fyrir bifreiðar frá 1. júlí til 31. desember nk. Þótt lækkunin sé tímabundin er hún engu að síður mikilvægt skref í þá átt að breytingin úr þungaskatti í olíugjald verði farsæl og almenn sátt ríki um hana.
Með því að hafa olíugjaldið óbreytt stefndi í það að hver lítri af dísilolíu yrði dýrari en bensínlítrinn. Það hefði þýtt að færri bifreiðaeigendur hefði endurnýjað bensínfólksbifreiðar sínar í dísilknúnar bifreiðar en ella og umhverfislegur og þjóðhagslegur ávinningur af breytingunni hefði orðið rýrari.
Í athugasemdum með frumvarpinu segir m.a. að mikilvægt sé að innbyrðis samræmi sé í skattlagningu á dísilolíu og bensíni þannig að dísilknúnar fólksbifreiðar verði álitlegri kostur fyrir einstaklinga en þær hafa verið hingað til og að sambærilegar rekstrarforsendur eigi við hvort sem bifreið er dísil- eða bensínknúin.
Þetta eru einmitt þau sjónarmið sem FÍB hefur haldið fram. Því fagnar félagið því að ráðherra hafi nú tekið undir þau með þessum afgerandi hætti.