Öruggustu bílarnir

Sænska tryggingafélagið Folksam hefur í fimmtánda sinn lista yfir öruggusta bílana. Niðurstöðurnar eru byggðar á raunverulegum umferðarslysum og rannsóknum á þeim. Einungis 14 prósent bílanna reyndust að mati Folksam vera bæði öruggir og umhverfismildir.

Folksam vill að bílar séu bæði öruggir og umhverfismildir.

Anders Kullgren sem stjórnar slysarannsóknum hjá Folksam segir við sænska fjölmiðla að öryggisþættir bíla séu meðal þeirra þátta sem mestu skipta um það að fækka látnum og alvarlega slösuðum í umferðinni.  Af þeim sökum sé mikilvægt að flokka bíla og birta síðan lista yfir öruggustu bílana. En jafnframt megi alls ekki slaka á kröfum um að draga sem mest úr skaðlegum áhrifum bíla á umhverfið. Þessvegna sé nauðsynlegt að taka líka tillit til eyðslu og þar með umhverfismildi bíla.

Folksam leggur mikið upp úr öryggiskerfum í bíla og eitt þeirra al nauðsynlegustu að mati Folksam eru kerfi sem hemla bílnum sjálfvirkt þegar hindrun er framundan. Ef slík kerfi væru til staðar í öllum bílum (sem er fjarlæg draumsýn ennþá) myndu þau fækka látnum og alvarlega slösuðum í umferðinni um 20 prósent að mati slysarannsóknamanna.

Meðal öruggustu bílanna á lista Folksam eru tveir bílar sem hafa þennan búnað sem staðalbúnað. Þeir eru Toyota Prius Executive og Volvo V70 Bi-Fuel. En sjálfvirkur hemlunarbúnaður er auðvitað fáanlegur í marga aðra bíla sem aukabúnaður. Flestir þeirra er þó allt of eyðslufrekir til að eiga möguleika á að komast á lista Folksam.

Til að auðvelda neytendum að velja sér örugga bíla óháð stærð hefur Folksam sett saman lista yfir bíla í átta stærðarflokkum. Listana er að finna hér. Með því að smella á flipana undir myndinni eru ýmsar upplýsingar kallaðar fram. Hér má t.d. finna lista yfir sigurbíla ársins hvern í sínum flokki.