Renault-Nissan tekur stjórnina hjá AvtoVAZ

Renault-Nissan eignast 50,01% hlutafjár í AvtoVAZ, stærsta bílaframleiðslufyrirtæki Rússlands samkvæmt viljayfirlýsingu sem undirrituð var í morgun. AvtoVAZ varð upphaflega til á sjötta áratugi síðustu aldar í samvinnu Sovétríkjanna og Fiat á Ítalíu. Reist var ný bílaborg á bökkum Volgu með verksmiðjum og íbúðahverfum fyrir starfsmenn og fékk borgin hið ítalsk-rússneska nafn Togliatti. Fyrstu bílarnir voru Fiat 124 sem búið var að aðlaga að ýmsu leyti rússneskum aðstæðum eins og afleitum vegum og vetrarkuldum.

Efri myndin er af Lada Priora en sú neðri af gömlum þekktum vini; Lada Niva sem enn er framleiddur.

Viljayfirlýsingin í morgun er milli Renault-Nissan og rússneska ríkisfyrirtækisins Russian Technologies.  Hún er í stuttu máli sú að Renault-Nissan eignast 67 prósenta hlut í rússneska ríkisfyrirtækinu sem fyrir á 74,5 prósent í AvtoVAZ. Með kaupunum verður Renault-Nissan eigandi 50,01 prósents hlut í AvtoVAZ. Fyrir hlutinn greiðir Renault-Nissan 750 milljónir dollara. Í frétt frá Renault-Nissan segir að reikna megi með því að kaupin verði endanlega frágengin fyrir lok ársins.

Rekstur AvtoVAZ hefur verið erfiður undanfarin ár, ekki síst vegna þess að rússneskir bílakaupendur hafa í ört vaxandi mæli sniðgengið innlenda bíla og snúið sér að erlendum. Lítil endurnýjun hefur átt sér stað í bílaframleiðslunni hjá AvtoVaz. Gamla Ladan hefur lítið breyst eða þróast frá upphaflegu Lödunni og á fyrsta ársfjórðungi dróst salan á henni saman um 15% miðað við sama tímabil í fyrra og hefur nú verið tilkynnt um að framleiðslunni á henni verði hætt. Þá hefur það ekki bætt úr skák að AvtoVAZ neyddist í síðustu viku til að hefja innköllun á tæplega 100 þúsund nýjum Lödum vegna framleiðslugalla.