Renault sýnir lúxus-blæjubíl í París

Renault Nepta - frumgerð sem sýnd verður í París síðar í mánuðinum.

Dýrir sport- og sportlegir bílar með opnanlegum toppi – blæju eða stáltoppi - eru í tísku meðal vel megandi Frakka á Miðjarðarhafsströnd Frakklands. Þar þykir flott að geta þegar sól skín í heiði að geta ýtt á hnapp og toppurinn flettist ofan af bílnum og rennur ofaní skott og kælandi vindurinn leikur um mann. Þegar svo hitaskúrin skellur á upp úr hádeginu er bara að ýta aftur á takkann og toppurinn lokast á ný og skýlir fyrir regninu meðan það gengur yfir.

Við Miðjarðarhafsströndina milli Nice og Cannes býr fjöldi auðmanna ýmist allt árið eða hluta úr árinu og í bílskúrnum er oft auk lúxusbílsins sem notaður er til langferða, blæjubíll af dýrri tegund og gerð, sem skroppið er á í spilavítið í Monaco eða niður í bæ í St. Tropez til að sýna sig og sjá aðra.

Þessir sportbílar sem algengt er að finna í frönskum auðmannabílskúrum eru oftar en ekki mjög dýrir breskir Gran Tourismo bílar – af tegundum eins og Rolls Royce Corniche, Bentley Azure eða Aston Martin og nú spyrja menn sig hjá Renault hvort einhverjar sérstakar nauðir reki franska auðmenn tll kaupa á erlendum ofurlúxus- blæjubílum. Skyldu þeir ekki kaupa innlent ef það stæði til boða?

Þessvegna hefur Renault nú hannað og byggt frumgerð ofurlúxus GT blæjubíls sem nefnist Renault Nepta og er nafnið vísun til rómverska sjávarguðsins Neptúnusar. Bíllinn verður sýndur á sýndur á bílasýningunni í París sem opnuð verður undir mánaðamótin næstu. Í frétt frá Renault segir að í Nepta sameinist allt það sem mikinn og góðan fjögurra sæta GT blæju-lúxusbíla má prýða. Það er að segja afburða formfegurð, yfirburða þægindi, afl og afbragðs aksturseiginleikar og að þessi bíll þeirra beinlínis stafi frá sér hreinum lúxusljóma.