Verðskrá sem tekur mið af breyttri hleðsluhegðun rafbílaeigenda

Orka náttúrunnar hefur gefið út nýja verðskrá sem tekur mið af breyttri hleðsluhegðun íslenskra rafbílaeigenda og aukinni afkastagetu hleðslustöðva. Fram kemur í tilkynningu að til þessa hefur verðskráin verið óhagstæðari fyrir eldri bíla sem þurft hafa lengri tíma til að hlaða en meðal breytinga er að nú er ekkert mínútugjald tekið í hraðhleðslum ON og aðeins greitt fyrir kWst.

Síðar á árinu  verður sett tafagjald á bíla sem eru enn tengdir við hraðhleðslustöð eftir að hleðslu er lokið. Áfram verður innheimt lágt tímagjald á 22kW hleðslum, eða 0,5 kr/mín.

20% afsláttur af hraðhleðslum og 10% af heimilisrafmagni

Þær breytingar á verðskránni sem tóku gildi 1. janúar 2021 eru að rafbílaeigendur með virkan ON-lykil fá 20% afslátt af hraðhleðslum og 10% afslátt af notkun heimilisrafmagns. Kröfurnar eru þá eingöngu þær að vera rafbílaheimili, þ.e. heimili í viðskiptum við ON ásamt því að vera með rafbíll og virkan ON-lykil. Ávinningurinn getur verið töluverður fyrir þau heimili sem nýta sér þessi sérkjör eða á milli 8-10 þúsund kr. á ári sé miðað við meðalnotkun.