Fréttir

Samvinnuverkefni um samgönguframkvæmdir voru samþykkt sem lög frá Alþingi 29. júní sl. Alls greiddu 55.6% þingmanna atkvæði með frumvarpinu, 30,2% greiddu ekki atkvæði, 8 þingmenn voru fjarverandi en aðeins einn þingmaður, Oddný Harðardóttir 6. þingmaður Suðurkjördæmis, greiddi atkvæði gegn frumvarpinu.

Í nýjasta FÍB blaðinu er áhugaverð grein um sjálfkeyrandi bíla eftir Katrínu Eddu Þorsteinsdóttur vélaverkfræðing sem vinnur hjá Bosch í Þýskalandi við hugbúnaðarþróun fyrir sjálfkeyrandi bíla. Það er ánægjulegt að ungur íslenskur verkfræðingur sé hluti af einu fremsta sérfræðingateymi veraldar við nýsköpun og þróun sjálkeyrandi bíla.

Ef áætlanir ganga eftir mun einbreiðum brúm á Hringveginum fækka um þrjár á þessu ári. Þeim mun síðan fækka aftur um sama fjölda á árinu 2021. Um 36 einbreiðar brýr eru á landinu núna.

Fiat Chrysler bílasamstæðan hefur innkallað hátt milljóni bíla í Bandaríkjunum vegna galla í öryggispúðum bílanna. Hér er ekki um að ræða öryggispúða framleidda af japanska fyrirtækinu Takata.

Það er furðulegt að fylgjast með árásum skipulagsyfirvalda í Reykjavík á bíleigendur. Skrif formanns skipulags- og samgönguráðs Reykjavíkur í Morgunblaðið 13. júlí voru af þessu tagi, allt var fundið einkabílnum til foráttu. Bílgreinasambandið hefur ekki lagst gegn eflingu almenningssamgangna en það er undarlegt að verða aftur og aftur vitni að því að skipulagsyfirvöld í Reykjavík telja sig geta beitt öllum meðulum gegn notendum einkabílsins og þannig gengið freklega á rétt þeirra sem hafa valið þann samgöngumáta. Þetta er þess sem kemur meðal annars fram í aðsendri grein Maríu Jónu Magnúsdóttur, framkvæmdastjóra Bílgreinasambandsins, í Morgunblaðinu.

,,Á sumrin hafi verið talsvert að gera við að hjálpa erlendum ferðamönnum samkvæmt beiðnum systurfélaga FÍB erlendis. Núna er breyting á því. Talsvert meira er að gera úti á landi við dekkjaskipti, start og flutning bíla Íslendinga en fáar beiðnir berast um aðstoð við erlenda ferðamenn,“ segir Hjörtur Gunnar Jóhannesson, starfsmaður við FÍB Aðstoð, í samtali við Morgunblðið í dag.

Sigurður Ingi Jóhannsson, samgöngu- og sveitarstjórnarráðherra vígði nýjan veltibíl í síðustu viku. Tilgangur bílsins er að vekja athygli á bílbeltanotkun en hann er á vegum Brautarinnar, bindindisfélags ökumanna, til að auka umferðaröryggi. Stefna íslenskra stjórnvalda er mjög skýr, öryggi liggur til grundvallar allri stefnumótun og aðgerðum í samgöngumálum.

Í könnun sem spænski bílaframleiðandinn Seat lét vinna fyrir sig kom í ljós að þegar hundur er með í bílnum hefur hann góð áhrif á aksturslag ökumannsins. Rúmlega helmingur hundaeigenda í könnun Seat sögust aka með meiri gætni þegar hundurinn væri með í för. Ábyrgðartilfinningin jókst til muna eftir því sem ökumaðurinn var yngri en minnkaði að sama skapi eftir sem ökumennirnir voru eldri.

Endurnýjanlegir orkugjafar verða sífellt aðgengilegri valkostur fyrir neytendur þegar kemur að vali á bílum. Útlit er fyrir að orkuskiptin munu verða að veruleika á næstu árum og áratugum en það tekur þó tíma að umbylta orkunotkun. Jarðefnaeldsneyti er þrátt fyrir það enn í miklum meirihluta. Samdráttur var í bruna á jarðefnaeldsneyti bílaflotans milli ára. Þetta er meðal þess sem kemur fram í Árbók bílgreina 2020.

Kínverski rafbílaframleiðandinn BYD stefnir að því að fara inn á norskan markað í meira mæli en hann hefur gert fram þessu. Borgaryfirvöld í Osló hafa nú þegar góða reynslu af viðskiptum við þennan kínverska framleiðanda. Frá árinu 2018 hafa þau keypt af BYD 45 strætisvagna knúna rafmagni og er reynslan af þeim afar góð.