Fréttir

Um 58% Íslendinga eru á móti vegatollum, sem notaðir yrðu til uppbyggingar á vegakerfinu á því svæði á Íslandi sem þeir yrðu innheimtir á meðan um 42% segjast vera hlynnt þeim. Þetta kemur fram í nýrri skoðanakönnun Maskínu sem fram fór dagana 24. febrúar til 6. mars.

Orka náttúrunnar og N1 ætla í sameiningu að reisa hlöður fyrir rafbíla meðfram helstu þjóðvegum landsins. Stjórnendur fyrirtækjanna hafa skrifað undir samkomulag um að hlöður ON rísi á afgreiðslustöðvum N1 víðsvegar um land.

Umferðin um 16 lykilteljara Vegagerðarinnar á Hringveginum jókst um meira en 15 prósent í febrúar sem er gríðarlega mikil aukning, en fyrir ári var líka slegið met í aukningu í umferðinni en nú er aukningin enn meiri. Þetta kemur fram í könnun sem Vegargerðin gerði.

Volvo verksmiðjurnar greindu frá því i vikunni að velta fyrirtækisins hefði aukist um 5,7% í febrúar miðað við sama mánuð á síðasta ári. Vöxturinn var töluverður í Evrópu og Asíu í febrúar en á sama tíma féll hann í Bandaríkjunum.

Umferðin á höfuðborgarsvæðinu jókst um 5,6 prósent í febrúar miðað við sama mánuð fyrir ári síðan. Umferðin á höfuðborgarsvæðinu hefur aldrei verið meiri í febrúar. Frá áramótum hefur umferðin aukist um 7,4 prósent. Útlit er fyrir að umferðin í ár gæti þá aukist um fimm prósent. Þetta kemur fram á vefsíðu Vegagerðarinnar.

Peu­geot 3008 er bíll árs­ins í Evrópu 2017 en þetta var tilkynnt á bílasýningunni sem hófst í Genf í Sviss í dag. Þessi útnefning þykir ein sú virtasta í bílaheiminum en bíllinn hefur vakið verðskulduga athygl. Í öðru sæti var Alfa Romeo Giulia og í þriðja sæti hafnaði Mercedes E-class.

Þó nokkrar hræringar eiga sér stað um þessar mundir í eignarhaldi hjá bílaframleiðendum. Nú hefur verið tilkynnt opinberlega um yfirtöku franska bílaframleiðandans PSA á dótturfélagi General Motors í Evrópu en meðal vörumerkja í eigu GM í Evrópu eru bílamerkin Opel og Vauxhall.

Toyota er mest seldi bíllinn fyrstu tvo mánuði ársins en tölufræði þessa efnis kemur fram á heimasíðu Samgöngustofu. Alls seldust 390 bílar af þessari tegund og Kia kemur þar á eftir með 346 bíla.

Borgaryfirvöld í Peking í Kína hafa sett á laggirnar áætlun þess efnis að skipta út öllum bensínknúnum leigubílum fyrir rafknúna leigubíla. Er þetta einn liðurinn í þeirri áætlun að stemma stigu við þeirri miklu mengun sem er í borginni.

Frá og með 1. mars tóku í gildi nýjar og hertar reglur við notkun farsíma undir stýri á Englandi, Skotlandi og Wales. Ökumenn í þessum löndum, sem ekki nýta sér handfrjálsan búnað við notkun farsíma, standa nú frammi fyrir mun harðari viðurlögum en áður.