Fréttir

Hinn nýi forstjóri Vegagerðarinnar, Bergþóra Þorkelsdóttir, talar fyrir því að auka enn frekar álögur á bíla og umferð. Í viðtali á Rás 2 þann 24. janúar lýsti hún sig hlynnta vegtollum til að fjármagna nauðsynlegar endurbætur á vegakerfinu, sem hún sagði sprungið.

Samgöngustofa hefur tekið saman gögn um nýskráningu 20 mest seldu nýju fólksbílanna eftir undirtegundum árið 2018. Um er að ræða nýskráningar sem falla ekki undir notkunarflokkinn ,,ökutækjaleiga”. Mitsubishi Outlander var lang vinsælasti bíllinn með 778 nýskráningar. Toyota RAV4 var í öðru sæti með 354 nýskráningar og Volkswagen Golf númer þrjú með 346 nýskráningar. Toyota Land Cruiser naut mikilla vinsælda með 345 nýskráningar og Nissan Leaf fór einnig yfir 300 bíla markið með 323 nýskráningar. Röð 20 vinsælustu fólksbílanna má sjá í töflu 1 hér undir.

Peugeot 208 var mest seldi bíllinn í Danmörku 2018 en alls seldust 8.776 bifreiðar af þessari tegund. Annar mest seldi bíllinn var Nissan Qashqai, alls 7.638 bifreiðar, og 6.145 bifreiðar af Volkswagen Golf seldust sem kom í þriðja sætinu. Í sætum þar á eftir komu VW Polo, Citroen C3, Toyota Yaris, VW Up og Renault Clio.

Neytendastofu hefur borist tilkynning frá Heklu hf. um að innkalla þurfi 20 Volkswagen Golf og Volkswagen T-Roc bifreiðar sem framleiddar voru á árið maí til ágúst 2018 . Ástæða innköllunar er að möguleiki er á að suða fyrir höfuðpúðafestingar í aftursæti séu ekki eins og hún á að vera.

Árið 2018 var sérlega hagstætt bílaframleiðandanum Dacia, sem seldi alls 700.798 bíla á mörkuðum heimsins, 7% fleiri en 2017. Sölumet var sett á Evrópumarkaði, þar sem 10,3% aukning varð á árinu og 511.622 bílar nýskráðir.

FÍB hefur fengið sterk viðbrögð frá félagsmönnum í kjölfar viðtalsins við vegamálastjóra í morgunútvarpi Rásar 2 í morgun. Það vekur athygli að forstjóri ríkistofnunar leggi til nýja skatta á íslenska vegfarendur vegna aukins álgas frá erlendum ferðamönnum.Bergþóra Þorkelsdóttir forstjóri Vegagerðarinnar segist hlynnt því að teknir verði upp vegtollar eða veggjöld. Hún segir vegakerfið sprungið enda sé það byggt upp fyrir fámenna þjóð en við það bætist svo tvær og hálf milljón ferðamanna.

Meirihluti landsmanna, eða 56,1% aðspurðra, er frekar eða mjög andvígur hugmyndum um veggjöld verði innheimt til að fjármagna uppbyggingu helstu stofnleiða samgöngukerfisins samkvæmt könnun sem Zenter gerði að beiðni Fréttablaðsins. Einn af hverjum þremur er frekar eða mjög hlynntur slíkum hugmyndum.

Í viðhorfskönnun sem Samgöngustofa gerði í lok síðasta árs kemur fram að svarendur telja hverskonar notkun farsíma á meðan á akstri stendur hættulega. Í könnuninni kemur einnig fram að 53% aðspurðra telja sig sem ökumenn verða fyrir mestri truflun í umferðinni af völdum farsímanotkunar annarra ökumanna. Þótt allir aðspurðir segi það hættulegt að skrifa skilaboð á farsíma á meðan á akstri stendur viðurkenna um 25% að þeir viðhafi slíka hegðun. Það er þó gleðiefni að þetta eru umtalsvert færri en mældist árið á undan en þá sögðust 33% vera sek um þetta.

Mikill þungi var lagður í umferðaröryggismál hjá lögreglunni á Norðurlandi vestra á liðnu ári. Sérstök umferðardeild var sett á fót innan embættisins sem hafði það að megin markmiði að ná niður umferðarhraða í umdæminu og fækka þar með umferðarslysum. Nú liggur niðurstaða ársins fyrir og er ánægjulegt frá því að segja að mjög vel tókst til, mikil fjölgun í kærðum umferðalagabrotum og veruleg fækkun umferðarslysa sem hvorugt á sér fordæmi. Þetta kemur fram á Facebook-síðu lögreglunnar á Norðurlandi vestra.

Alþjóðasamtök bifreiðaeigenda, FIA, og Alþjóða ólympíuhreyfingin, IOC, hafa undirritað samstarfssamning sem lítur að því að hægt verði að nálgast efni FIA, svo sem á mótorsporti og vegaöryggi. Ólympíska stöðin verður aðgengileg á heimasíðu IOC, í gegnum snjallforrit og á sjónvarpsstöð hreyfingarinnar. Samningurinn er talinn geta ýtt undir meira áhorf og fleiri styrktaraðila til framtíðar litið.