Fréttir

Vegagerðin ætlar að breyta útfærslu fyrirhugaðra vegamóta við Arnarnesveg og Breiðholtsbraut. Fallið er áformum um mislæg gatnamót en í stað þess verða sett ljósstýrð gatnamót eins og fram kemur í tilkynningu frá Vegagerðinni.

Um tuttugu prósenta samdráttur er í tekjum Vaðlaheiðarganga hf. fyrstu átta mánuði ársins og vantar þar tæpar sextíu milljónir króna. Þetta hefur áhrif á greiðslugetu félagsins af láni til ríkissjóðs sem hefjast um mitt næsta ár. Þetta kemur fram á ruv.is

Umferð á höfuborgarsvæðinu í síðustu viku var 21 prósenti minni en í sömu viku fyrir ári síðan og átta prósentum minni en í vikunni þar á undan. Í umfjöllun Vegagerðarinnar segir að líklegt má telja að auknar samkomutakmarkanir og hvatning sóttvarnaryfirvalda til fólks um að vera sem minnst á ferð að óþörfu skili sér í þessum samdrætti í umferð.

Vegna umræðu um öryggi á vegum að undanförnu vill forstjóri Vegagerðarinnar koma því á framfæri að starfsmenn eru harmi slegnir yfir banaslysi á Kjalarnesi í júnilok og því að slíkar aðstæður hafi getað skapast við venjubundið viðhald á vegum. Vegagerðin vinnur nú að umfangsmikilli endurskoðun á öllum ferlum sem lúta að yfirlögnum á vegakerfinu. Markmið þeirrar vinnu er að tryggja að slys sem þetta geti ekki komið fyrir aftur.

Frá því að grunnskólar á höfuðborgarsvæðinu tóku aftur til starfa í ágúst hefur lögreglan verið með aukið eftirlit við skólana í umdæminu og þar sem þekkt er að börn þurfi að þvera veg til að komast til og frá skóla, en meðal annars hefur verið notast við ómerkta lögreglubifreið með hraðamyndavélabúnaði við eftirlitið.

Í Morgunútvarpi Rásar 2 í morgun kom fram í máli Runólfs Ólafssonar, framkvæmdastjóra Félags íslenskra bifreiðaeigenda, að honum líst illa á hugmyndir tveggja þingmanna Vistri grænna um að veita sveitarfélögum heimild til að innheimta umhverfisgjöld, meðal annsr af mengandi bílum.

Í fréttaskýringaþættinum Kveik á Ríkissjónvarpinu, þar sem tekið er á málefnum bæði innanlands og utan, var í gærkvöldi til umfjöllunar ástandið á vegakerfi landsins og annað sem að því lítur. Það hefur ekki farið framhjá þeim sem um vegi landsins fara að ástand þeirra er afar báborið víða. Uppbygging og alla lagfæringu á þessu sviði hefur skort um árabil. Þetta ástand hefur víða skapað mikla hættu og mörg slys og óhöpp má beinlínis rekja til slæms ástands vega. Vegir eru holóttir, það eru djúp hjólför í þeim, og svo hefur malbik og klæðningar á vegum skapað hættu eins og dæmin hafa sannað á síðustu misserum.

Lúxusrafbíllinn Mercedes-Benz EQS mun koma á markað á næsta ári og verður hann flaggskip rafbílaflota þýska lúxusbílaframleiðandans. Mercedes-Benz kemur fram með nýjan arkitektúr á næsta ári sem byggir á rafmagni. Þýski lúxusbílaframleiðandinn mun setja margar gerðir bíla á markað á næsta ári sem allir verða hreinir rafbílar og framleiddir af EQ deild Mercedes-Benz. Með þessum áætlunum ætlar Mercedes-Benz sér að vera leiðandi í þróun rafbíla á heimsvísu.

Framkvæmdir eru að hefjast við ný gatnamót Borgartúns og Snorrabrautar, sem mun laga þau betur að núverandi gatnakerfi. Í stað beygju á Borgartúni verður það framlengt út að Snorrabraut og í fyrsta áfanga á að opna fyrir hægri beygjur.

Malbik sem lagt var á nokkra kafla á höfuðborgarsvæðinu í sumar, þar á meðal á Kjalarnesi, stóðst ekki kröfur sem til þess eru gerðar í útboði Vegagerðarinnar og munar miklu. Tveir einstaklingar á bifhjóli létu lífið á þessum vegakafla 28. júní í sumar. Kröfur um holrýmd stóðust ekki og heldur ekki kröfur um viðnám að útlögn lokinni. Þetta er niðurstaða fyrstu rannsóknar á malbikskjörnum frá fimm köflum sama útboðs. Sýni voru rannsökuð hjá Nýsköpunarmiðstöð Íslands og hjá VTI í Svíþjóð. Frekari rannsóknir fara nú fram.