Fréttir

Árleg alþjóðleg minningarathöfn um fórnarlömb umferðarslysa verður haldin við þyrlupall bráðamóttöku Landspítalans í Fossvogi sunnudaginn 17. nóvember kl. 14. Sambærilegar athafnir verða haldnar víða um land á vegum Slysavarnarfélagsins Landsbjargar. Hliðstæð athöfn fer fram víða um heim undir merkjum Sameinuðu þjóðanna sem hafa tileinkað þriðja sunnudag í nóvember þessari minningu.

Orkusjóður hefur úthlutað styrkjum að upphæð 227 milljónum króna til uppsetningar 43 nýrra hraðhleðslustöðva vítt og breitt um landið. Nýju stöðvarnar eru þrisvar sinnum aflmeiri en öflugustu stöðvarnar sem fyrir eru hérlendis og eiga að stuðla að hindrunarlausum ferðum rafbíla milli landshluta.

Neytendastofu hefur borist tilkynning frá BL ehf. um að innkalla þurfi 87 Subaru XV bifreiðar af árgerð 2017 til 2019. Ástæða innköllunarinnar er að mögulega þarf að skipta um háspennukefli og endurforrita vélstjórnarbox.

Hjörtur Gunnar Jóhannesson hjá Félagi íslenskra bifreiðaeigenda kennir réttu handtökin við að gefa bílum start eins og fram kom í viðtali við hann í Fréttablaðinu um helgina.

Vegagerðin stóð fyrir ráðstefnu á dögunum undir yfirskriftinni Rannsóknaráðstefna Vegagerðarinnar. Þetta var í 18. sinn sem þessi ráðstefna er haldin og var hún vel sótt og mörg áhugaverð erindi flutt. Á ráðstefnunni voru kynnt 17 rannsóknaverkefni sem er þó bara hluti þeirra verkefna sem er í gangi hjá Vegagerðinni hverju sinni.

Sala á bílum í Þýskalandi hefur aukist töluvert það sem af er þessu ári. Fara þarf reyndar aftur til ársins 2008 til að sjá svipaða bílasölu. Einungis í október mánuði seldust 285 þúsund nýir bílar í Þýskalandi sem gerir um 13% aukningu miðað við sama mánuð í fyrra.

Umferðin á höfuðborgarsvæðinu í október jókst um 1,6 prósent sem er minnsta aukning í þessum mánuði síðan árið 2011. Þetta er sama þróun og á sér stað á Hringveginum sbr. eldri frétt. Umferðin það sem af er ári hefur aukist um 1,2 prósent sem er einnig minnsta aukning síðan 2011 eftir sem fram kemur í tilkynningu frá Vegagerðinni.

Umferðin á Hringvegi í október jókst um 0,4 prósent og er þetta minnsta aukning í októbermánuði síðan árið 2011 eða í átta ár. Fjögurra prósenta samdráttur mældist í umferðinni á Suðurlandi og má leiða lýkur að því að samdráttur í ferðamennsku skýri þann samdrátt. Reikna má með að umferðin í ár aukist eigi að síður um 2,5-3 prósent. Þetta kemur fram í tölum frá Vegagerðinni.

Bílaumboðið Askja tekur formlega við Honda umboðinu á Íslandi þann 8. nóvember nk. Askja tekur við Honda umboðinu af Bernhard sem er í eigu fjölskyldu stofnandans, Gunnars Bernhards. Fyrir er Askja með umboð fyrir Mercedes-Benz og Kia og nú bætist Honda við sem þriðja vörumerkið hjá fyrirtækinu.

Það full fljótt farið í það að afnema virðisaukaskattsívilnanir á tengil tvinnbílum eins og gert er ráð fyrir í drögum fjármála- og efnahagsráðherra að frumvarpi til laga að mati Runólfs Ólafssonar, framkvæmdastjóra Félags íslenskra bifreiðaeigenda, FÍB, í umfjöllun um málið í Morgunblaðinu í dag. Fram kemur að tengil tvinnbílar séu kjörið fyrsta skref í átt að vistvænni bílaflota en ívilnunin samkvæmt þessu falla niður 1. janúar 2021.